نحبك بحرية

يمكن حياتك تتبدّل كي تحبّ وتعشق إنسان بيه تحيا وبيه تموت. آنا زادا حياتي تبدّلت أما موش هكّاكا. آنا حياتي تبدّلت كي عرفت بحريّة... بحريّة لونها لون البحر وصوتها صوت الموجة كي تضرب في الحجر.
كي نمشي بحذاها تودّني بكاس تاي وتسمّعني أمّ كلثوم. نمشي بحذاها وآنا بالسّيف نتنفّس وحاسّة روحي باش نتخنق. بحريّة تهديني هواها وترجّع فيّا الروح ونمسح دموعي، ونرجع نمّن بألف ليلة وليلة.
نضحك لبحريّة ونقلّها زيدني رشفة تاي وخلّي الستّ تغنّي وإيجا نحكيلك على بكايا وفرحتي وخوفي وحلماتي. إيجا نحكيلك على طيحاتي وقوماتي. إيجا نحكيلك على ناس وبلايص ربّي سبحانو حطّهم في ثنيّتي، ناس وبلايص حبّيتهم ولتوّا بصماتهم فيّا ..