ريحة البلاد

الروايح اللي كانت تفوح مالمدينة, كانت تهز عروش القلب , شنية روايح ؟ كان بنادم كي يتعدى كل دار يشم فيها ريحة تفولغ المخ . دار تشم فيها ريحة معجون السفرجل بالقرفة و عود القرنفل , و دار ريحة الملاوي بزيت الزيتونة, و دار ريحة الكسكسي بالعصبان, و دار قاتو الدرع بالعطرشية, و دار ريحة الفريكاسي, و دار ريحة المبطن بالخرشف , و دار حلالم بالقديد , و دار ريحة المعقودة بالرنقة, و إلا ملوخية , و إلا مدفونة, بناضج , مدموجة , و ساعة على ساعة ريحة البخور , و شق و داد , و إلا ريحة زليزية الحرقوس . و الخبز إللي كانو يطيبوه في الديار أنواع و أشكال عد و أغلط : خبز قمح, و خبز شعير, و خبز ذرة, و خبز مبسس, و خبز طابونة , و كسرة, و خبز غناي, و خبز فطير, و خبز أبراج , و خبز الشطيرة بالعظم, و خبز مالح بالدجاج و الزوايد و إلا باللحم , إلخ .... يا حسرة يا زمان .

tahar fazaa